ਭਵਿਖਬਾਣੀਆਂ
ਕੁਝ ਦਿਨ ਪਹਿਲਾਂ ਮੈਂ ਯੂਟਿਊਬ ਤੇ ਦੇਖ ਰਿਹਾ ਸੀ,
ਇਕ ਪੰਡਤ ਸਾਲ ਦੀ ਪੇਸ਼ੀਨਗੋਈ ਕਰ ਰਿਹਾ ਸੀ,
ਉਹ ਕਿਤੇ ਅੱਗ ਤੇ ਕਿਤੇ ਭੁਚਾਲ ਲਿਆ ਰਿਹਾ ਸੀ,
ਉਹ ਕਿਤੇ ਹੜ ਤੇ ਕਿਤੇ ਸੋਕੇ ਪਵਾ ਰਿਹਾ ਸੀ,
ਕਿਤੇ ਜੰਗ ਤੇ ਕਿਤੇ ਦੈਵੀ ਸ਼ਸਤਰ ਚਲਾ ਰਿਹਾ ਸੀ,
ਉਹ ਗੱਲਾਂ ਬਹੁਤ ਵੱਡੀਆਂ-ਵੱਡੀਆਂ ਕਰ ਰਿਹਾ ਸੀ,
ਤੇ ਫੋਕੀਆਂ ਤੇ ਭਰੀਆਂ ਛੱਡ ਰਿਹਾ ਸੀ,
ਉਹ ਆਪਣੀਆਂ ਗਿਣਤੀਆਂ ਮਿਣਤੀਆਂ ਵਿਚ ਪੈ ਰਿਹਾ ਸੀ,
ਤੇ ਵੀਹ-ਵੀਹ ਸਾਲ ਪੁਰਾਣੀਆਂ ਭਵਿਖਬਾਣੀਆਂ ਛਪਵਾਈਆਂ ਦਿਖਾ ਰਿਹਾ ਸੀ,
ਉਹ ਫੁੱਲਿਆ ਨਹੀਂ ਸਮਾ ਰਿਹਾ ਸੀ,
ਆਪਣੀਆਂ ਗੱਲਾਂ ਕਹੀਆਂ ਲਿਖੀਆਂ ਦੇ ਸੱਚ ਹੋਣ ਤੇ,
ਮੈਂ ਵੀ ਨਾਸਤਿਕ ਜਿਹਾ ਅਨੰਦ ਲੈ ਰਿਹਾ ਸੀ ਉਹਦੇ ਪਖੰਡ ਤੇ,
ਉਹਨੂੰ ਦੁਨੀਆਂ ਦਾ ਨਹੀਂ ਆਪਣੀ ਰੋਟੀ ਦਾ ਫਿਕਰ ਸੀ,
ਤੇ ਮੈਂ ਵੀ ਉਹਦੇ ਕਹਿਣ ਤੇ ਉਹਦੇ ਭੁੱਖੇ ਚੈਨਲ ਨੂੰ ਗਾਹਕੀ ਲਾ ਦਿੱਤੀ,
ਉਹ ਦੇਖਣ ਨੂੰ ਮਰੀਅਲ ਜਿਹਾ ਸੀ ਤੇ ਭੁਖਮਰੀ ਦਾ ਸ਼ਿਕਾਰ ਲੱਗਦਾ ਸੀ,
ਉਹ ਕਹਿ ਰਿਹਾ ਸੀ ਕਿ ਬਈ ਨਵਾਂ ਸਾਲ ਚੜਦਿਆਂ ਹੀ,
ਭਾਰਤ ਪਾਕਿਸਤਾਨ ਦੇ ਝਮੇਲੇ ਵਿਚ ਭਾਂਬੜ ਮੱਚੇਗਾ,
ਜਦੋਂ ਚੰਗਿਆੜੀ ਲੱਗੇਗੀ ਕੋਈ ਰੋਵੇਗਾ ਤੇ ਕੋਈ ਹੱਸੇਗਾ,
ਪਾਕਿਸਤਾਨ ਤੇ ਭਾਰਤ ਦੀ ਕੁੰਡਲੀ ਖੋਲ ਉਹਨੇ ਕਰਿਆ ਵਿਸ਼ਲੇਸ਼ਣ ਜਿਹਾ,
ਉਹ ਕਹਿੰਦਾ ਪਾਕਿਸਤਾਨ ਉਂਗਲੀ ਲਾਵੇਗਾ ਤੇ ਭਾਰਤ ਨਾ ਵਿਹਲਾ ਬੈਠੇਗਾ,
ਨਵੰਬਰ ਤੱਕ ਜਾਂਦਿਆਂ-ਜਾਂਦਿਆਂ ਤਮਾਸ਼ਾ ਖੂਬ ਭਖੇਗਾ,
ਪਾਕਿਸਤਾਨ ਤੇ ਦੈਂਤਾਂ ਦੇ ਗੁਰੂ ਸ਼ੁੱਕਰ ਦੀ ਸਵਾਰੀ ਹੈ,
ਉਤੋਂ ਦੇਵਤਿਆਂ ਦੇ ਗੁਰੂ ਬ੍ਰਹਸਪਤ ਵਿਚ ਕਮਜ਼ੋਰੀ ਹੈ,
ਨਾਲੋਂ ਨਾਲ ਮੰਗਲ, ਬੁੱਧ ਤੇ ਸ਼ਨੀ ਵੀ ਭਾਰੀ ਹੈ,
ਸੂਰਜ ਵੀ ਅੱਗ ਲਾ ਰਿਹਾ ਤੇ ਚੰਦਰਮਾ ਦੀ ਵੀ ਲੜਨ ਦੀ ਤਿਆਰੀ ਹੈ,
ਇਹ ਵਾਰ-ਵਾਰ ਕੁੱਟ ਖਾ ਕੇ ਵੀ ਆਪਣੀਆਂ ਕਮੀਨੀਆਂ ਤੋਂ ਬਾਜ਼ ਨਾ ਆਉਂਦਾ ਹੈ,
ਉਹ ਭਾਰਤ ਨੂੰ ਇਕ ਲੰਮੀ ਜੰਗ ਦੀ ਤਿਆਰੀ ਕਰਵਾ ਰਿਹਾ ਸੀ,
ਕਿਤੇ ਕਸ਼ਮੀਰ ਤੇ ਕਿਤੇ ਅਖੰਡ ਭਾਰਤ ਦੀ ਵਾਰ-ਵਾਰ ਦੁਹਾਈ ਪਾ ਰਿਹਾ ਸੀ,
ਹੁਣ ਛੱਡੀਏ ਪੰਡਤਾਂ ਦੀ ਭੁੱਖੀ ਪੰਡਤਾਈ ਨੂੰ ਤੇ ਗੱਲ ਕਰੀਏ ਮੌਕੇ ਦੀ,
ਭੁਖਮਰੀ ਦੋਨਾਂ ਮੁਲਕਾਂ ਵਿਚ ਆਮ ਜਿਹੀ ਤੇ ਬੰਦੇ ਦੀ ਇਥੇ ਨਾ ਕਦਰ ਕੋਈ,
ਵਿਹਲਾ ਮਨ ਹੁੰਦਾ ਹੈ ਸ਼ੈਤਾਨ ਦਾ ਘਰ ਤੇ ਦੋਵੇਂ ਪਾਸੇ ਹੈ ਵਿਹਲੜਾਂ ਦੀ ਫੌਜ ਜਿਹੀ,
ਅਸਲ ਮੁੱਦਿਆਂ ਤੋਂ ਧਿਆਨ ਹਟਾਉਣ ਲਈ ਜੰਗ ਬਹਿੰਦੀ ਹੈ ਦੋਵਾਂ ਮੁਲਕਾਂ ਨੂੰ ਸੂਤ ਜਿਹੀ,
ਹਾਰ ਜਿੱਤ ਦਾ ਤਾਂ ਪਤਾ ਨਹੀਂ ਪਰ ਦੋਵੀਂ ਪਾਸੀਂ ਪਟਾਕੇ ਖੂਬ ਪੈਣਗੇ,
ਜਦ ਮੌਤ ਦਾ ਫ਼ਰਿਸ਼ਤਾ ਅਜਰਾਈਲ ਫੇਰੀ ਪਾਵੇਗਾ,
ਤਾਂ ਜਮਦੂਤ ਵਾਧੂ ਪੈਦਾਵਾਰ ਨੂੰ ਵਾਲਾਂ ਤੋਂ ਫੜਨ ਘੜੀਸਣਗੇ,
ਜਦੋਂ ਧਰਮਰਾਜ ਆਪਣਾ ਦਰਬਾਰ ਲਾਕੇ ਕਰਮਾਂ ਦਾ ਹਿਸਾਬ ਮੰਗੇਗਾ,
ਤਾਂ ਉਹ ਬਹੁਤਿਆਂ ਨੂੰ ਦੋਜ਼ਖ ਦੀ ਅਗਨੀ ਭੱਠੀ ਦੀ ਲੰਮੀ ਸੈਰ ਕਰਾਵੇਗਾ,
ਪਹਿਲਾਂ ਬਲਨਾ ਸੜਨਾ ਤੁਸਾਂ ਜਿੰਦਾ ਰਹਿੰਦੇ ਹੋਏ ਤੇ ਫਿਰ ਦੋਜ਼ਖ ਦੀ ਅੱਗ ਵਿਚ,
ਅੱਲਾ-ਹੂ-ਅਕਬਰ ਤੇ ਹਰ-ਹਰ ਮਹਾਂਦੇਵ ਨੇ ਨਾ ਯਾਦ ਆਉਣਾ ਤੁਹਾਨੂੰ ਦੋਜ਼ਖ ਵਿਚ,
ਨਾ ਮਿਲਣੀਆਂ ਤੁਹਾਨੂੰ ਕੋਈ ਹੂਰਾਂ ਓਥੇ ਤੇ ਨਾ ਹੀ ਬੈਕੁੰਠ ਵਿਚ ਜਗ੍ਹਾ ਕੋਈ,
ਭੈੜੇ ਕਰਮਾਂ ਬਾਬਤ ਨਿਤ ਪਛਤਾਉਣਾ ਤੇ ਰੋਣਾ ਕੁਰਲਾਉਣਾ ਦੋਹਾਂ ਤੁਸੀਂ,
ਪਾਕਿਸਤਾਨ ਦਾ ਆਕਾ ਚੀਨ ਭਾਰਤ ਤੋਂ ਹੈ ਅਮੀਰ ਪੰਜ ਛੇ ਗੁਣਾਂ,
ਨਾ ਹੀ ਉਹਦੇ ਕੋਲ ਕਮੀ ਭੂੰਡ ਪਟਾਕਿਆਂ ਦੀ ਤੇ ਨਾ ਹੀ ਅਬਾਦੀ ਘੱਟ ਤੁਹਾਡੇ ਤੋਂ,
ਉਹਦੀ ਵੀ ਹੈ ਅੱਖ ਕਸ਼ਮੀਰ ਉਤੇ ਤੇ ਰੇਸ਼ਮ ਦੀਆਂ ਕੂਲੀਆਂ ਸੜਕਾਂ ਤੇ,
ਅਖੰਡ ਭਾਰਤ ਬਣਾਉਣਾ ਨਾ ਵਸ ਹੈ ਤੁਹਾਡੇ ਇਕੱਲਿਆਂ ਦੇ,
ਰੂਸ ਦੀ ਪੁਰਾਣੀ ਕਦਰ ਤੇ ਅਲਿਫ ਲੈਲਾ ਦੀ ਯਾਰੀ ਛੱਡ ਤੁਸਾਂ,
ਅਮਰੀਕਨਾਂ ਤੇ ਵਹਾਬੀਆਂ ਨਾਲ ਯਾਰੀਆਂ ਪਾ ਲਈਆਂ,
ਪਰ ਅਮਰੀਕਨ ਗੋਰੀਆਂ ਨਾ ਆਉਂਦੀਆਂ ਤੁਹਾਡਾ ਗੋਹਾ ਕੂੜਾ ਕਰਨ ਨੂੰ,
ਤੇ ਮੁੱਲੇ ਮੁਲਾਣੇ ਨਾ ਦੇਣ ਆਪਣੀ ਧੀ ਦਾ ਡੋਲਾ ਗੈਰ ਮੁਸਲਮਾਨ ਨੂੰ,
ਤੁਹਾਡੀ ਇਸ ਗ਼ਦਾਰੀ ਨੇ ਰੂਸ, ਚੀਨ ਤੇ ਫਾਰਸ ਦੀਆਂ,
ਫੌਜਾਂ ਦਾ ਅਖਾੜਾ ਓਮਾਨ ਦੀ ਖਾੜੀ ਵਿਚ ਲਗਵਾ ਦਿੱਤਾ,
ਫ਼ਾਰਸ ਦੇ ਤੇਲ ਤੋਂ ਬਗੈਰ ਨਾ ਤੁਹਾਡੀ ਪਸ਼ਤੂਨਾਂ ਨਾਲ ਹੈ ਦਾਲ ਗਲਣੀ,
ਨਾ ਹੀ ਤੁਹਾਡੀ ਮੱਧ ਏਸ਼ੀਆ ਦੇ ਮੁਲਕਾਂ ਨਾਲ ਤਿਜਾਰਤ ਹੋਣੀ,
ਤੁਹਾਡੀ ਬਿੱਲੀਆਂ ਦੀ ਰੋਟੀ ਦੀ ਵੰਡ ਦਾ ਤਾਂ ਪਤਾ ਨਹੀਂ ਕੀ ਬਣੂੰ,
ਪਰ ਯਹੂਦੀ ਤੇ ਗੋਰੇ ਨਾ ਬਣਨ ਦੇਣ ਫ਼ਾਰਸ ਦੇ ਭੂੰਡ ਪਟਾਕੇ ਪ੍ਰਮਾਣੂ,
ਤੁਹਾਡੀਆਂ ਨੰਗਾਂ ਦੀਆਂ ਤਿਆਰੀਆਂ ਮੁਕੰਮਲ ਨਾ ਹੋਣ ਕਦੇ,
ਪਰ ਉਹਨਾਂ ਪੂਰੇ ਮੱਧ ਪੂਰਬ ਖ਼ਿੱਤੇ ਅੰਦਰ ਜੰਗ ਦੇ ਬਿਗਲ ਵਜਾ ਛੱਡੇ,
ਸਾਲ ਦੇ ਘੋੜੀ ਚੜਦੇ ਹੀ ਮਿਰਜ਼ੇ ਖਾਨ ਨੇ ਲੈਲਾ ਦੇ ਭਾਈ ਟੰਗ ਦਿੱਤੇ,
ਟ੍ਰੰਪ ਨੇ ਦਫਤਰ ਵੜਦਿਆਂ ਹੀ ਅਗਲੀਆਂ ਚੋਣਾਂ ਦਾ ਸੀ ਬਿਗਲ ਵਜਾ ਦਿੱਤਾ,
ਤਾਲਿਬਾਨਾਂ ਤੇ ਕਿਮ ਜੂਨ ਨਾਲ ਸਮਝੋ ਇਸ ਸਾਲ ਉਹਨੇ ਝਗੜਾ ਮੁਕਾ ਦਿੱਤਾ,
ਚੀਨ ਨਾਲ ਵੀ ਉਸਨੇ ਇਸ ਸਾਲ ਆਪਣੀ ਡੀਲ ਵਾਲੀ ਕਲਾ ਵਰਤਾ ਦੇਣੀ,
ਫਿਰ ਦੱਸ ਖਾਂ ਭਾਰਤ ਸਿੰਘਾਂ ਕਿਸ ਨੇ ਤੇਰੀ ਬਾਂਹ ਫੜਨੀ ਜਾਂ ਤੈਨੂੰ ਕੁੜੀ ਦੇਣੀ,
ਐਵੇਂ ਪਖੰਡੀ ਪੰਡਤਾਂ ਦੇ ਪਿੱਛੇ ਲੱਗ ਕੇ ਆਪਣਾ ਝੱਗਾ ਨਾ ਚੌੜਾ ਕਰਵਾ ਬੈਠੀਂ,
ਇਹਨਾਂ ਕਾਗਜ਼ੀ ਗੱਲਾਂ ਵਿਚ ਤਖ਼ਤਾ ਤਾਂ ਪਲਟ ਦਿੱਤਾ ਸੀ 1857-58 ਵਿਚ ਵੀ,
ਪਰ ਈਸਟ ਇੰਡੀਆ ਕੰਪਨੀ ਦੇ ਤਖ਼ਤੇ ਤੇ ਆਣ ਬੈਠੀ ਸੀ ਮਹਾਰਾਣੀ ਵਿਕਟੋਰੀਆ,
ਹੁਣ ਵੀ ਭਾਰਤ ਸਿੰਘਾਂ ਤੇਰੀ ਕਾਣੀ ਵੰਡ ਵਿਚ ਮਹਾਰਾਣੀ ਦਾ ਰਾਜ ਆ ਸਕਦਾ,
ਇਸੇ ਕਰਕੇ ਹੀ ਸੁਰ ਬਦਲੀ ਹੋਈ ਹੈ ਕਸ਼ਮੀਰ ਮਸਲੇ ਤੇ ਬੀਬੀਸੀ/ਜੀ ਦੀ,
ਇਸੇ ਕਰਕੇ ਹੀ ਗੁਰੂਦੁਆਰਿਆਂ ਵਿਚ ਗੋਰੀ ਫੌਜ ਹੈ ਆਉਂਦੀ ਭਰਤੀ ਲਈ,
ਇਸੇ ਕਰਕੇ ਹੀ ਡਾਇਨਾ ਦੀ ਔਲਾਦ ਹੈ ਪਾਕਿਸਤਾਨ ਦੀ ਗੇੜੀ ਲਾਉਂਦੀ,
ਤੇਰੀ ਨਾਲਾਇਕੀ ਕਰਕੇ ਹੀ ਰੂਸੀ ਯਾਰ ਮੁੱਲਿਆਂ ਨਾਲ ਜੰਗੀ ਮਸ਼ਕਾਂ ਕਰਦੇ ਹਨ,
ਇਸੇ ਕਰਕੇ ਹੀ ਗੋਰਿਆਂ ਦੇ ਮੁਲਕਾਂ ਵਿਚ ਲੋਕੀਂ ਖਾਲਿਸਤਾਨ ਦੀਆਂ ਗੱਲਾਂ ਕਰਦੇ ਹਨ,
ਓਏ ਪਖੰਡੀਆ ਤੇਰੀਆਂ ਚਤਰਾਈਆਂ ਵਿਚੋਂ ਹੀ ਨਿਕਲਿਆ ਸੀ ਪਾਕਿਸਤਾਨ,
ਤੇ ਹੁਣ ਤੇਰੀਆਂ ਯਮਲੀਆਂ ਕਮਲੀਆਂ ਵਿਚੋਂ ਹੀ ਨਿਕਲੇਗਾ ਖਾਲਿਸਤਾਨ,
ਅਖੰਡ ਹਿੰਦੁਸਤਾਨ ਦੇ ਚੱਕਰ ਵਿਚ ਜੋ ਖੰਡ ਹੈ ਉਹ ਵੀ ਨਾ ਗਵਾ ਬੈਠੀਂ,
ਭਵਿਖਬਾਣੀਆਂ ਹੁੰਦੀਆਂ ਨੇ ਮਹਾਂਪੁਰਖਾਂ ਦੇ ਪੱਲੇ ਤੇ ਉਹ ਵੀ ਕਦੇ ਕਦੀਂ,
ਜਿਵੇਂ ਆਉਣ ਅਠੱਤਰਵੇਂ ਤੇ ਜਾਣ ਸਤਾਨਵੇਂ ਤੇ ਹੋਰ ਵੀ ਉਠੇਗਾ ਮਰਦ ਕਾ ਚੇਲਾ,
ਜਿਵੇਂ ਭ੍ਰਿਗੂ ਸ਼ਾਸਤਰ ਦੁਨੀਆਂ ਵਿਚ ਪੈਦਾ ਹੋਣ ਵਾਲੇ ਹਰ ਸ਼ਖਸ ਬਾਰੇ ਦੱਸਦਾ,
ਜਿਵੇਂ ਹਦੀਸ ਫ਼ਾਰਸ ਦੀ ਤਬਾਹੀ ਤੇ ਫਿਰ ਕਿਆਮਤ ਤੋਂ ਪਹਿਲਾਂ ਗਜ਼ਵਾ-ਏ-ਹਿੰਦ ਬਾਰੇ ਦੱਸਦਾ,
ਜਿਵੇਂ ਨਾਸਟ੍ਰੇਡਮਸ ਤੀਸਰੀ ਵਿਸ਼ਵ ਜੰਗ ਤੇ ਖਾਲਿਸਤਾਨ ਦੇ ਰਾਜ ਬਾਰੇ ਦੱਸਦਾ,
ਜੋ ਮੁਲਕ ਆਪਣੇ ਬਹੁਤੇ ਹਥਿਆਰ ਨਹੀਂ ਬਣਾ ਸਕਦਾ,
ਜੋ ਇਕ ਹਫ਼ਤੇ ਤੋਂ ਵੱਧ ਆਪਣੇ ਬਲ-ਬੂਤੇ ਤੇ ਲੜਾਈ ਵੀ ਨਹੀਂ ਲੜ ਸਕਦਾ,
ਉਹ ਜਗਦੇਵ ਗੁਰੂ ਬਣ ਦੁਨੀਆ ਨੂੰ ਕੀ ਸਬਕ ਪੜਾਵੇਗਾ,
ਉਹ ਆਪਣੇ ਹੀ ਸਬਕ ਪੜਾਉਣ ਦੇ ਚੱਕਰ ਵਿਚ ਸਬਕ ਪੜ ਜਾਵੇਗਾ ।
-ਦੇਵ ਬਰਾੜ